Western Balkans Environment Programe

TIRANË, më 10 Korrik  2008 – Hartimi i politikave mjedisore serioze është një kusht i domosdoshëm për një zhvillim ekonomik të qendrueshëm, kësisoj është i rëndësishëm vazhdimi i procesit të përafrimit të legjislacionit shqiptar me standartet e BE-së për Vlerësimin e Ndikimit në Mjedis (VNM) dhe Vlerësimin Strategjik Mjedisor (VSM), si dhe për rritjen e kapaciteteve të pushtetit qendror dhe lokal për zbatimin e këtyre politikave.

Menaxheri i Projektit, Lirim Selfo tha se ekziston nevoja e forcimit të mekanizmave që prodhojnë mirëqeverisje dhe integrim të politikave në nivel lokal dhe qendror me qëllim rritjen e shkallës së informimit. Ai tha gjithashtu se ekziston nevoja e koordinimit të VNM-ve me VSM-të, si mekanizma të qenësishëm për zbatimin e politikave përkatëse.

Gavrosh Zela, Drejtues i Departamentit për Vlerësimin e Ndikimit në Mjedis dhe Liçensimit në ministrinë e Mjedisit theksoi rëndësinë e seminarit dhe atë të zhvillimit të kapaciteteve për trajtimin e çështjeve mjedisore në nivel qendror dhe lokal.

Koordinatorja teknike e Projektit, Klodiana Marika bëri një përshrim të përgjithshëm të medotave që përdoren për identifikimin e pikave të nxehta mjedisore.

“Ndotja e ujit dhe e tokës nga mbetjet e rrezikshme vazhdon të jetë një ndër problemet mjedisore më të mprehtë në shkallë botërore”, tha Marika. 

Alken Myftiu, drejtues projekti në Qendrën Mjedisore Rajonale (QMR) informoi pjesëmarrësit në lidhje me legjislacionin mjedisor në kontekstin e menaxhimit të pikave të nxehta mjedisore si dhe për përpjekjet që po bëhen për përafrimin e legjislacionit vendas me standartet e BE-së, duke i kushtuar një vemendje të veçantë legjislacionit sekondar që ka të bëjë me Vlerësimin e Ndikimit në Mjedis.

Jamarber Malltezi, ekspert për VSM-të në prezantimin e tij u përqendrua në procedurat për zbatimin e VSM-ve dhe të konsultimit me publikun në përputhje me Konventën  Aarhus si dhe për çështje që kanë të bëjnë me plotësimin e legjislacionit përkatës në Shqipëri.

Për më tepër informacion ju lutem kontaktoni:

Lirim Selfo
Menaxher Projekti
Kjo adresë e-mail-i është e mbrojtur nga spam bots, duhet të aktivizoni Java skriptet për të parë atë

Marina Vuji
Specialiste për Marrëdhëniet me Publikun
Kjo adresë e-mail-i është e mbrojtur nga spam bots, duhet të aktivizoni Java skriptet për të parë atë